Luiz Bavaresco Conta a Sua História (italiano)

Luiz Bavaresco, abonante del nostro giornale in Muçum-RS, che lé, anca, gerente del Banrisul, el stránia come la gioventú d´oncoi no la crede la stória e la vita de na volta, lora el conta lú come lé sucedesta sta stória tea sô vita. El dise: "Tel ano de 1941 son vegnesto al mondo. Son nato te on pósto che i ghe ciamea Cascais, chi a chel tempo l´era tel distrito del Paraí, tel munissípio de Nova Prata. Desso i é dú munissipi sia el Paraí, sia Nova Prata.

Me pare e me mare i era da star lí da on bel tempo. I era vegnésti de Alfredo Chaves tel 1936. La mudansa i la gá portada te na carreta tirada a mui. Un fogoneto, un baú co le robe, due o tré pignate de ferro, arquánti piáti, na cassa co méda dúsia de galine, no sapa o due, la manara e el roncon.

Riváldi al pósto i zê nadái star te na caseta che la zera sora la terra che i gavea comprá dei brasiliáni, che l´era sensa soáio in terra. In méso ghe zera on grande fogolaro co na correntona ligada sú te un caibro e che la pendea sora el fogo, e lá se fava el magnar.

La Escola

Te un abiente cosi son nato e, grássia a Dio, gó impará tante bele robe, como el rispeto e l´obediensa. Me ricordo che te´l inverno stévino túti quánti, nove fradéi, drio el fogolaro, sentái te na bancheta de tole, túti rente per scaldarse, intanto che se pregava la corona, e dopo se disea sú le tánie. Dopo se finia le preghiere, se cipava la gamela, se la impienia de ácoa calda e túti se lavava i pié per nadar in leto. I léti i éra túti grándi e álti, e parea cassôni.

Tel teto ghera on paion fato de scartóssi de milho e sora el paion, on paioneto de pena de galina o de oca. I tusiti i se butava túti insiéme  te un leto e le tosete tute insiéme te n´altro leto.

Cô se ndea in leto se pregava n´altro pochetin e dopo se dormia. A matina, se levava sú bonora, prima del sol, se fea i laúri de casa e dopo se ndea scola. La professora, me ricordo che la gavea 53 alúni del primo al quinto ano e la insegnava tute le matérie, e come se imparava polito?! No la gá mái fato greve e la cipava ssti míseri sóldi che la prefeitura la ghe pagava. Dopo la scola, la maestra la ndava casa par môlder le vache, farghe de magnar al sô omo, e ai sô túsi e tose. Grássia Dio la me maestra la vive ancora, co chei póchi sóldi che a ciapa dea posentadoria dea prefeitura.

Me gó pensá de contar tuta sta stória, parche oncô no se pol gnanca parlar a la gente gióvane de sti mistiéri de na volta parchê lúri no i crede gnanca. Se ghe digo che gó guadagná le prime scarpe com úndesse áni, i ride depí oncora. E se ghe digo che prima de ésser mie le zê stae de me sorele, i ride de depí oncora. Le gera de tanto pí grande del me pié, e lora parchê le stesse ben tel pié, se inpenia la ponta co carta de giornal vécio, che l´era próprio del Correio Riograndense. Ma, parchê le scarpe piú grande del pié? Saví che da pícoli se vien sú come la salata e doman o dopo, i pié i si alarga e le scarpe no le vá piú ben, pensando che a chel tempo che se ndea in colónia pié per terra i pié i vignea sempre piú grándi e le scarpe tocava farle sora mesura. Lora ste scarpe le servia anca alcúni áni dopo, fin che i pié i ghea stea rento. Dopo, magári, le scominciava a ésser doperade per fradeléti che i vegnea da drio.

Le Braghe

E le braghe? Le braghe le gera de brin che i ciamea brin diamantino, le rivava fin el danócio, co le sô bele tirache larghe, fate del stesso brin, se ghen vansava, sinó anca de altro color. Tel inverno, i pié e anca ele gambele se crepava del fredo che ghe géra. lora se dassava la rogna che la vegnea su grossa on deo. Quando la mama la se ricordea, la ciapava on bótolo e la sfreghea fin che vegnea fora el sángoe, per fare végner ancora al color dea péle. Ve digo tuto e tute ste stórie perché me ricordo con grann saudade de qüéi témpi. Quando se ndea piantar formento soto la brina alta quatro déi. De tuto´l miél che gó giutá a cavar de le ave e de tute de rósse ché gó giutá a sapar soto´l sol e soto la pióva.

Incói vardo intorno e vedo na giuventú sensa gnanca na sperienza e che i me mete paúra parché diman i sará lúri che i vá comandar ste mondo.

Par finir ve digo che dimênega che vién vui ndar lá, ndove son nassisto e vui bêvar áqua te la medésima fontana e vai vardar le piante che securamente le zê ancora lá, vui ricordar me pupá e me mama, vui pregar e domandarghe a Dio che´l benedissa chel pósto e che tute  le matine de sol, i ángeli del celo i vegna te chel pósto par tênderlo e benedirlo.

Texto criado em Muçum-RS, publicado no Jornal Correio Riograndense, na seção "Vita, Stória e Frótole - Cozi vive i italiani" em 19.10.1988, em dialeto italiano.